Psa 103 | NdeIBE | STEP | ElikaDavida Dumisa uJehova, O mphefumulo wami; konke okuphakathi kwami, kakudumise ibizo lakhe elingcwele.

Psalms 103

1 Dumisa uJehova, O mphefumulo wami; konke okuphakathi kwami, kakudumise ibizo lakhe elingcwele.

2 Dumisa uJehova, O mphefumulo wami, ungaze wakhohlwa konke asiza ngakho –

3 othethelelayo zonke izono zakho akusilise zonke izifo zakho,

4 ohlenga impilo yakho egodini akwethese uthando lesihawu,

5 osuthisa izifiso zakho ngezinto ezinhle ukuze ubutsha bakho buvuselelwe njengengqungqulu.

6 UJehova ubenzela ukulunga lokwahlulela okuhle labo abacindezelweyo.

7 Izindlela zakhe wazazisa uMosi, izenzo zakhe wazazisa abantu bako-Israyeli;

8 UJehova ulesihawu njalo ulomusa, uyaphuza ukuthukuthela, kodwa uyanda ngothando.

9 Kahlali ebeka imilandu njalo, futhi kagcini ulaka lwakhe kokuphela;

10 kasiphathi ngokufanele izono zethu kumbe asijezise ngokulingene iziphambeko zethu.

11 Ngokuba njengokuphakama komkhathi ngaphezu komhlaba, lukhulu kangako uthando lwakhe kulabo abamesabayo;

12 njengobukhatshana bempumalanga kuyo intshonalanga kanjalo ususile iziphambeko zethu kithi.

13 Njengalokhu uyise elozwelo ebantwaneni bakhe, kanjalo uJehova ulozwelo kulabo abamesabayo;

14 ngokuba uyakwazi ukuthi sibunjwa njani, uyakhumbula ukuthi siluthuli.

15 Umuntu yena izinsuku zakhe zinjengotshani, ukhula amemetheke njengembali yeganga;

16 umoya uyayiphephetha ihle inyamalale, indawo yakhe ingabe isayikhumbula lanini.

17 Kodwa kusukela phakade kusiya phakade uthando lukaJehova lukulabo abamesabayo, lokulunga kwakhe ebantwaneni babantwana

18 kulabo abagcina isivumelwano sakhe njalo bakhumbule ukulalela izimiso zakhe.

19 UJehova usemisile isihlalo sakhe sobukhosi ezulwini, njalo ubukhosi bakhe buphezu kwakho konke.

20 Dumisani uJehova, lina maxuku akhe asezulwini, lina zinceku zakhe elenza intando yakhe, elilalela ilizwi lakhe.

21 Dumisani uJehova, lonke mabandla akhe asezulwini, lina zinceku zakhe elenza intando yakhe.

22 Dumisani uJehova, imisebenzi yakhe yonke ezindaweni zonke embusweni wakhe. Dumisa uJehova, O mphefumulo wami.